maruun to mai kisii chehare mey rang bhar jaauN
'Nadeem' kaash yahii ek kaam kar jaauN
ye dasht-e-tark-e-muhabbat ye tere qurb kii pyaas
jo izaan ho to terii yaad se guzar jaauN
meraa vajuud merii ruuh ko pukaarataa hai
terii taraf bhii chaluuN to Thahar Thahar jaauN
tere jamaal kaa partau hai sab hasiinon par
kahaan kahaan tujhe DhuNduun kidhar kidhar jaau
mai zindaa thaa ki teraa intazaar Khatm na ho
jo tuu milaa hai to ab sochataa hun mar jaauN
ye sochataa hun ki mai but parast kyun na huaa
tujhe qariib jo pauuN to Khud se Dar jaauN
kisii chaman mey bas is Khauf se guzar na huaa
kisii kalii pe na bhuule se paau na dhar jaauN
ye jii mey aatii hai taKhliiq-e-fan ke lamhon mey
ki Khuun ban ke rag-e-sang mey utar jaauN
No comments:
Post a Comment