Khwab-e-safar per saath chalain gay../

Ik shab aankh kinaray

Ik doojay ka haath pakar ker … 

Jhootay sachay ehed karain gay, 

Main kuch un dekhay sapnon ki ..

Ungli thaam kay lay aaon gee,

Tum kuch ru-pehli taberain ..

Zaad-e-safar kay taur per lana … …
Ho sakta hai khwab-e-safar main
Barish bhi ho, aandhi bhi ho
Ho sakta hai toofanon nay,
Shart safar say baandhi bhi ho …
Ho sakta hai kuch jugnoo, kuch taaray
Apni raah main aain
Ho sakta hai ghor andhairay main hi
Hum donon kho jain
Is jungle main nadi kinaray
Thoray sapnay bo aain gay
Aur behti nadi main donon
Gham ki gard bhi dho aain gay
Ik bargad kay pair kay neechay
Teray shanay per sir rakh ker
Main apnay sab dukh ro loon gee
Tum apni jalti aankhon per
Meri barf hatheli rakhna .. !
Tum yadon kay roshan jugnoo
Apni mutthi main bhar lena
Main bhi aanchal kay pehloo main
Ujli yadain rakh laoon gee
Is dauraan hi khwab ki devi
Hum donon say haath chura ker
Such ki bheer main kho jaye gee..!
Chahay such kitna karwa ho
Dukh ko maat to ho jaye gee..!
Phir tum neend nagar ko jana
Main khwabon main reh jaoon gee
Ik shab aankh kinaray
Neend say pehlay aao
Khwab-e-safar per saath chalain gay!

ek khwaab aur..!!

khwaab ab Husn-e-tasavvur ke ufaq se haiN pare

dil ke ek jazbaa-e-ma’suum ne dekhe the jo khawaab

aur ta’beeroN ke tapte hue sehraaoN meN

tashnagii aabla-paa, sh’ola-bakaf mauj-e-saraab

ye tau mumkin nahiin bachpan ka ko’ii din mil jaaye

yaa palat aaye ko’ii sa’aat-e-naayaab-e-shabaab

phuuT nikle kisii afsurdah tabassum se kiran

yaa damak uTThe kisii dast-e-buriidah meN gulaab

aah ! patthar kii lakiireN haiN ke yaadoN ke nuquush

kaun likh saktaa hai phir umr-e-guzishtaa kii kitaab

beete lamHaat ke soye hue tuufaanoN meN

tairte phirte haiN phuuTii huii aaNkhoN ke Habaab

taabish rang-e-shafaq, aatish ruu-e-Khurshiid

mal ke cHehre pe saHar aayii hai KhuuN aHbaab

jaane kis moR pe, kis raaH meN kyaa beetii hai

kis se mumkin hai tamannaoN ke zakhmoN ka Hisaab

aastiinoN ko pukaareNge kahaaN tak aaNsuuN

ab tau daaman ko pakaRte haiN lahuu ke gardaab

dekhtii phirtii hai ek ek ka munh khaamoshii

jaane kyaa baat hai sharmindah hai andaaz-e-Khitaab

dar-ba-dar thokareN khaate huve phirte haiN savaal

aur mujrim ki tarah unse gurezaaN haiN javaab

sarkashii, phir maiN tujhe aaj sadaa detaa huN

maiN teraa shaa’iir-e-aawaaraa-o-be-baak-o-Kharaab

pheNk phir jazbaa-e-betaab ki aalam pe kamand

ek khwaab aur ai himmat-e-dushwaar pasand

lamhoN ke chiraaGh....

vo niiNd kii tarah narm sabzaa

KhvaaboN kii tarah ramiidaa shabnam

phuuloN kii tarah shaGhuftaa chehre

Khushbuu kii tarah latiif baateN

kirnoN kii tarah javaaN tabassum

shoale kii tarah dahaktii Khvaahish

taaroN kii tarah chamaktii aaGhosh

saaGhar kii tarah chalakte siine

sab qaafilaa-e-’adam ke raahii

vaadii-e-’adam meN chal rahe haiN

taariikiyoN ke khile haiN parcham

lamhoN ke chiraaGh jal rahe haiN

har laamhaa hasiin aur javaaN hai

har lamhaa faroGh-e-jism-o-jaaN hai

har lamhaa aziim-o-jaavidaaN hai

Ham Ne Soch Rakhaa Hai

Ham Ne Soch Rakhaa Hai

Chahe Dil Ki Har Khuwahish

Zindagi Ki Aankhon Se Ashk Ban K Beh Jaie

Chahe Ab Makeenon Per

Ghar Ki Saari Deewarain

Chat Sameet Gir Jaien

Aur Be-Muqadar Hum

Is Badan K Malbe Main Khud Hi Kion Na Dab Jaaien

Tum Se Kuch Nahin Kehna !

Kaisi Neend Thi Apni

Kaise Khwab The Apne

Aur Ab Gulabon Per

Neend Wali Aankhon Per

Narm-Khu See Khuwabon Per

Kion Azab Tote Hain

Tum Se Kuch Nahin Kehna !

Ghir Gaie Haain Baton Main

Be-Libas Baton Main

Is Taarah Ki Raton Main

Kab Chiragh Jalte Hain, Kab Azab Talte Hain

Ab To In Azabon Se Buch K Bhi Nikalne Ka Raasta Nahin Jaanan

Jis Tarah Tumhain Such K Lazawal Lamhon Se Wasta Nahin Jaanan

Ham Ne Soch Rakha Hai

Tum Se Kuch Nahin Kehna..!!

jab bhii chuum letaa huN un hasiiN aaNkhoN ko...!!!

Jab bhii chuum letaa huN un hasiiN aaNkhoN ko

sau chiraaGh andhere meN jhilmilaane lagte haiN

Khushk Khushk hoNTon meN jaise dil kheNch aataa hai

dil meN kitne aa’iine TharTharaane lagte haiN

phuul kyaa, shiGhuufe kyaa, chaaNd kyaa, sitaare kyaa

sab raqiib qadmoN par sar jhukaane lagte haiN

zehn jaag uThtaa hai, ruuh jaag uThtii hai

naqsh aadmiyaat ke jagmagaane lagte haiN

lau nikalne lagtii hai mandiroN ke siine se

devtaa fazaaoN meN muskuraane lagte haiN

raqs karne lagtii haiN muurateN Ajanta kii

muddatoN ke lab-bastaa ghaar gaane lagte haiN

phuul khilne lagte haiN ujRe ujRe gulshan meN

tishnaa-tishnaa ghatii par abr chhaane lagte haiN

lamha bhar ko ye duniyaa zulm chhoR detii hai

lamhaa bhar ko sab patthar muskuraane lagte haiN

jab bhii chuum letaa huN un hasiiN aaNkhoN ko...!!!

vo koii aur na thaa chand Khushk patte the...

vo koii aur na thaa chand Khushk patte the 

shajar se TuuT ke jo fasl-e-gul pe roye the

abhii abhii tumhen sochaa to kuchh na yaad aayaa

abhii abhii to ham ek-duusare se bichhre the

tumhaare baad chaman par jab ik nazar Daalii

kalii kalii mey Khizaan ke chiraaG jalte the

tamaam umr vafaa ke gunaah_gaar rahe

ye aur baat ki ham aadamii to ache the

shab-e-Khaamosh ko tanhaaii ne zabaaN de dii

pahaar guuNjte the dasht san_sanaate the

vo ek baar mare jin ko thaa hayaat se pyaar

jo zindagii se gurezaaN the roz marate the

naye Khayaal ab aate hain Dhal ke zahan mey

hamaare dil mey kabhii khet lah lahaate the

ye iratiqaa kaa chalan hai ki har zamaane mey

puraane log naye aadamii se Darte the

'Nadeem' jo bhii mulaaqaat thii adhuurii thii 

ki ek chehre ke piichhe hazaar chehre the

maruun to mai kisii chehare mey rang bhar jaauN

maruun to mai kisii chehare mey rang bhar jaauN 

'Nadeem' kaash yahii ek kaam kar jaauN 

ye dasht-e-tark-e-muhabbat ye tere qurb kii pyaas 

jo izaan ho to terii yaad se guzar jaauN

meraa vajuud merii ruuh ko pukaarataa hai

terii taraf bhii chaluuN to Thahar Thahar jaauN

tere jamaal kaa partau hai sab hasiinon par

kahaan kahaan tujhe DhuNduun kidhar kidhar jaau

mai zindaa thaa ki teraa intazaar Khatm na ho

jo tuu milaa hai to ab sochataa hun mar jaauN

ye sochataa hun ki mai but parast kyun na huaa

tujhe qariib jo pauuN to Khud se Dar jaauN

kisii chaman mey bas is Khauf se guzar na huaa 

kisii kalii pe na bhuule se paau na dhar jaauN

ye jii mey aatii hai taKhliiq-e-fan ke lamhon mey

ki Khuun ban ke rag-e-sang mey utar jaauN 

KyuuN..??

kuchh aise ghaao bhii hote hain 

jinhen zaKhmii aap nahiin dhote

bin roye huye aaNsuon kii tarah 

siine mey chhupaa ke rakhate hain

aur saarii umr nahiin rote

niindhen bhii muhaiyaa hotii hain

sapane bhii duur nahiin hote

kyun phir bhii jaagte rahate hain

kyun saarii raat nahiin sote

ab kis se kahen ai jaan-e-vafaa

ye ahal-e-vafaa kis aag mey jaltey rahate hain

kyun bujh kar raakh nahiin hotey..!!

Khud apane liye baiTh ke sochenge kisii din...

Khud apane liye baiTh ke sochenge kisii din
yun hai ki tujhe bhuul ke dekhenge kisii din

bhaTake hue phirate hain kaii lafz jo dil mey
duniyaa ne diyaa vaqt to likkhenge kisii din

hil jaayenge ik baar to arshon ke dar-o-baam
ye Khaak_nashiin log jo bolenge kisii din

aapas kii kisii baat kaa miltaa hii nahiin vaqt
har baat ye kahate hain ke baiThenge kisii din

ai jaan terii yaad ke be-naam parinde
shaaKhon pe mere dard kii utarenge kisii din

jaatii hai kisii jhiil kii gaharaaii kahaan tak
aankhon mey terii Duub ke dekhenge kisii din

Khushbuu se bharii shaam mey jugnuu k qalam se
ik nazm tere vaaste likkhenge kisii din 

soyenge terii aaNkh kii Khlvat mey kisii raat 
saaye men terii zulf ke jaagenge kisii din

Khushbuu kii tarah ,asl-e-sabaa Khaak numaa se
galiyon se tere shahar kii guzarenge kisii din

'Amjad' hai yahii ab ke kafan bandh ke sar se
us shahar-e-sitamgar mey jaayenge kisii din

aaKhirii baat..

Tuluu-e-shams-e-mufaraqat hai

puranii kirney naye makaano k aaNgano mey laraz rahii hain

fasiil-e-shahar-e-vafa k rozan chamakte zarron se bhr gaii hain

gaye dino ki aziz baaten nigaar subhen, gulaab raaten,

bisaat-e-dil bhii ajiib shay hai hazaar jiiten, hazaar maaten..

judaaiyon kii havaayen lamhon kii Khush maTTii uraa rahii hain..

gaii ruton kaa malaal kab tak?

chalo k shaaKhen to TuuTtii hain!

chalo k qabron pe Khuun rone se 

apnii aaNkhen hii phuuTtii hain..

ye mor vo hai jahan se mere tumhaare raste badal gaye hain

puraanii raahon ko lauTnaa bhii hamaarii taqdiir mey nhe

k raaste bhii hamaare qadmon k saath aagy nikal gaye hain..

tuluu-e-shams-e-mufaraqat hai

tum apnii aaNkhon mey jhilmilaate huye sitaaron ko maut de do!

gaii ruton k tamaam phulon tamaam Khaaron ko maut de do!

naye safar ko hayaat baKhsho

k pichlii raahon pe sabt jitney naquush-e-paa hain

vo baar hongy

havaa uraaye ke tum uRaao..!!

tumhaarii yaad ke jab zaKhm bharne lagte hain ....

tumhaarii yaad ke jab zaKhm bharne lagte hain 

kisii bahaane tumhen yaad karne lagte hain

hadiis-e-yaar k unavaan nikharne lagte hain 

to har hariim mey gesuu sanvarne lagte hain

[hariim - house]

har ajanabii hamen mahram dikhaaii detaa hai 

jo ab bhii terii galii galii se guzarane lagte hain

[maharam=acquaintance]

sabaa se karte hain Gurbat-nasiib zikr-e-vatan 

to chashm-e-subah mey aansuu ubharne lagte hain

[Gurbat-nasiib=those in exile; chashm=eye]

vo jab bhii karte hain is nuqt-o-lab kii baKhiyaa_garii 

fazaa mey aur bhii naGmen bikharne lagte hain

[nutq-o-lab=speech and lips]

dar-e-qafas pe andhere kii muhar lagtii hai 

to "Faiz" dil mey sitaare utarane lagte hain

[dar-e-qafas=door of the prison]

sabhii kuchh hai teraa diyaa huaa sabhii raahaten sabhii kalafaten .....

sabhii kuchh hai teraa diyaa huaa sabhii raahaten sabhii kalafaten 

kabhii sohabaten kabhii furqaten kabhii duuriyaan kabhii qurbaten

ye suKhan jo ham ne raqam kiye ye hain sab varq terii yaad k 

koii lamhaa subah-e-visaal kaa, kaii shaam-e-hijr kii qurbaten

jo tumhaarii maan len naasihaa to rahegaa daaman-e-dil mey kyaa? 

na kisii uduu kii adaavaten na kisii sanam kii muravvaten

chalo aao tum ko dikhaayen ham jo bchaa hai maqtal -e-shahar mey

ye mazaar ahal-e-safaa k hain , ye hain ahal-e-sidq kii turbaten

merii jaan aaj kaa Gam na kar, ke naa jaane kaatib-e-vaqt ne 

kisii apane kal mey bhii bhuul kar kahiin likh rakhii hon masarraten

himmat karo jiine ko abhii umr parii hai

is vaqt to yun lagata hai , 

ab kuchh bhii nahiin hai 

na mahataab 

na suuraj 

na andheraa 

na saveraa 

aankhon k dariiche mey kisii husn kii jhalkan 

aur dil kii panaahon men kisii dard kaa Deraa 

mumkin hai koii vaham ho 

mumkin hai sunaa ho !

galiyon mey kisii chaap kaa ek aaKhirii pheraa 

shaaKhon mey Khayaalon k ghane pairr kii, 

shaayad ! ab aake karegaa na koii Khvaab baseraa 

ik bair 

na ik mahar 

na ik rabt 

na rishtaa 

teraa koii apanaa na paraayaa koii meraa 

maanaa ki ye sun-saan gharii saKht barii hai 

lekin mere dil ye to faqat ek gharii hai 

himmat karo jiine ko abhii umr parii hai

Chal insha apne gaon may.......

Teri nigaah ke jadu bikharte jate hain.........

Teri nigaah ke jadu bikharte jate hain

Jo zakhm dil ko miley woh bharte jate hain

Tere bagher woh din bhi guzar gaye akhir

Tere bagher yeh din bhi guzarte jate hain

Liye chalo mujhe darya-e-shauk ki maujo

Ke hamsafar tou mere paar utarte jate hain

Tamaam umar jahan hanste khelte guzaari

Ab us gali mein bhi hum darte darte jate hain

Mein khawhishon ke gharonde banaye jata hoon

Woh mehntain meri barbaad kiye jate hain

araish-e-khayal bhi ho dilkusha bhi ho

araish-e-khayal bhi ho dilkusha bhi ho

 wo dard ab kahan jise ji chahta bhi ho

 ye kya k roz ek sa gham ek si ummid

is ranj-e-bekhumar ki ab inteha bhi ho

ye kya k ek taur se guzre tamam umr

ji chahta hai ab koi tere siwa bhi ho

 tute kabhi to khwab-e-shab-o-roz ka tilism

itne hujum main koi chehra naya bhi ho

diwangi-e-shauq ko ye dhun hai in dinon

ghar bhi ho aur be-dar-o-diwar sa bhi ho

 uz dil koi makan nahi dahar main jahan

rahzan ka khauf bhi na rahe dar khula bhi ho

har zarra ek mahmil-e-ibrat hai dasht ka

bhala-sa ho to hamain dekhta bhi ho

 har shay pukarti hai pas-e-parda-e-sukoot

lekin kise sunaun koi hamnawa bhi ho

fursat main sun shaguftagi-e-guncha ki sada

ye wo sukhan nahi jo kisi ne kaha bhi ho

Dil Yun Dharka k...

gehraa sannaaTaa hai

gehraa sannaaTaa hai
kuch makaanoN se Khamosh uThtaa hu’aa
gaaRhaa kaalaa dhuuaaN
mail dil meN liye
har taraf duur tak phailtaa jaataa hai
gehraa sannaaTaa hai

laash kii tarah bejaan hai raastaa
ek TuuTaa hu’aa Thelaa
ulTaa paRaa

Khataa maine ko’ii bhaarii nahiiN kii

Khataa maine ko’ii bhaarii nahiiN kii

                                       amiir-e-shah’r se yaarii nahiiN kii

kisii mansab kisii ohde kii khaatir

                                         ko’ii tadbiir baazaarii nahiiN kii

kab uskaa visaal chaahiye thaa

kab uskaa visaal chaahiye thaa

bas aik Khayaal chaahiye thaa




kab dil ko javaab se Gharz thi

hoNToN ko savaal chaahiye thaa

maskan-e-maah-o-saal chhoR gayaa

maskan-e-maah-o-saal chhoR gayaa

dil ko us kaa Khayaal chhoR gayaa

taazah-dam jism-o-jaaN the furqat meN

vasl us kaa nidhaal chhoR gayaa

ahd-e-maazii jo thaa ajab purhaal

aik viiraan haal chhoR gayaa

zaala-baarii ke marhaloN kaa safar

qaafile, paayemaal chhoR gayaa

dil ko ab ye bhii yaad ho ke na ho

kaun thaa , kyaa malaal chhoR gayaa

maiN bhii ab Khud se huuN  javaab-talab

vo mujhe be-savaal chhoR gayaa

Jaun Elia

ab bhalaa chhoR ke ghar kyaa karte

ab bhalaa chhoR ke ghar kyaa karte

shaam ke vaqt safar kyaa karte

terii masruufiyateN jaante the

apne aane kii Khabar kyaa karte

jab sitaare hii nahiiN mil paaye

le ke ham shams-o-qamar kyaa karte

vo musaafir hii khulii dhuup kaa thaa

saaye phailaa ke shajar kyaa karte

Khaak hii avval-o-aaKhir thahrii

kar (?) ke zarre ko gauhar kyaa karte

raaye pehle se hii banaa lii tuune

dil meN ab ham tere ghar kyaa karte

ishq ne saare saliiqe bakhshe

husn se kasb-e-hunar kyaa karte