Hum hi mein thi na koi baat yaad na tumko aa sake
tumne hamein bhulaa diya hum na tumhein bhulaa sake!
tum hii na sun sake agar, qissa-e-ghum sunegaa kaun
kis kii zubaaN khulegii phir, ham na agar sunaa sake
hosh meN aa chuke the ham, josh meN aa chuke the tum
bazm kaa rang dekh kar sar na magar uThaa sake
raunaq-e-bazm ban gaye, lab pe hikaayateN rahiiN
dil meN shikaayateN rahiiN, lab na magar hilaa sake
ijz se aur baDh gaii barhamii-e-mizaaj-e-dost
ab voh kare ilaaj-e-dost jis kii samajh meN aa sake
shouq-e-visaal hai yahaaN, lab pe savaal hai yahaaN
kiskii majaal hai yahaaN ham se nazar milaa sake
ahle zubaaN to haiN bohat, koii nahiiN hai ahl-e-dil
kaun terii taraH Hafeez dard ke geet gaa sake
No comments:
Post a Comment